மாஸான லுக்... மிரட்டலான பெர்ஃபார்மன்ஸ்! சர்வதேச சந்தையில் அறிமுகமானது புதிய ஹோண்டா CBR500R ஃபோர்!

ஹோண்டா நிறுவனம் தனது புதிய மிடில்வெயிட் ஸ்போர்ட்ஸ் பைக்கான CBR500R ஃபோர் -ஐ அறிமுகப்படுத்தியுள்ளது. மிடில்வெயிட் ரகத்தில் உள்ள மற்ற மோட்டார் சைக்கிள்களில் இருந்து இதை தனித்து காட்டுவது இதன் இன்லைன் ஃபோர்-சிலிண்டர் என்ஜின் தான். இந்த பைக்கை பற்றி நீங்கள் தெரிந்து கொள்ள வேண்டிய அனைத்து தகவல்களும் இதோ:

என்ஜின் மற்றும் பெர்ஃபார்மன்ஸ் 

CBR500R ஃபோர் பைக்கில் DOHC (டூயல் ஓவர்ஹெட் கேம்ஷாஃப்ட்) அமைப்புடன் கூடிய புதிய 502 cc இன்லைன் ஃபோர்-சிலிண்டர் என்ஜின் பொருத்தப்பட்டுள்ளது. இது 72.06 PS பவரையும், 47.4 Nm டார்க்கையும் வெளிப்படுத்தும். இதன் மோட்டார் அதிகபட்சமாக 12,500 rpm வரை செல்லும் திறன் கொண்டது.

இதில் ஹோண்டாவின் E-கிளட்ச் தொழில்நுட்பம் ஸ்டாண்டர்ட் அம்சமாக வழங்கப்பட்டுள்ளது. இது மேனுவல் கட்டுப்பாட்டை தக்கவைத்துக்கொள்ளும் அதே வேளையில் கிளட்ச் இல்லாமல் பைக்கை ஸ்டார்ட் செய்ய, நிறுத்த மற்றும் கியர் மாற்ற உதவுகிறது. இந்த என்ஜின் பரந்த அளவிலான பயன்பாட்டுத் திறனை வழங்குவதால், வேகமாகப் பயணிக்கும் போது சிறப்பான ஸ்போர்ட்டி ரைடிங் அனுபவத்தைத் தரும் என ஹோண்டா தெரிவித்துள்ளது.

கட்டமைப்பு மற்றும் பாகங்கள் 

இந்த பைக் முற்றிலும் புதிய ஸ்டீல் டைமண்ட்-ஸ்டைல் ஃபிரேம் அமைப்பில் உருவாக்கப்பட்டுள்ளது. முன்பக்கத்தில் KYB இன்வெர்டெட் ஃபோர்க் மற்றும் பின்புறத்தில் ப்ரீலோட் அட்ஜஸ்டபிள் மோனோஷாக் சஸ்பென்ஷன் வழங்கப்பட்டுள்ளது. பிரேக்கிங் அமைப்பைப் பொறுத்தவரையில் முன்பக்கத்தில் 296 மிமீ டுவின்-டிஸ்க் உடன் 2-பிஸ்டன் ரேடியல்-மவுண்டட் நிசின் காலிப்பர்களும் பின்புறத்தில் சிங்கிள்-டிஸ்க் அமைப்பும் கொடுக்கப்பட்டுள்ளன.

இரண்டு பக்கங்களிலும் 17-இன்ச் வீல்கள் பயன்படுத்தப்பட்டுள்ளன. இந்த பைக்கின் சீட் உயரம் 780 மிமீ ஆகவும், கிரவுண்ட் கிளியரன்ஸ் 135 மிமீ ஆகவும் உள்ளது. இதன் மொத்த கர்வ் வெயிட் 189 கிகி ஆகும். 

பைக் லுக் மற்றும் அம்சங்கள் 

CBR500R ஃபோர் மாடல் தனது பெரிய ரக பைக்குகளின் டிசைன் அமைப்பை அதிகளவில் பிரதிபலிக்கிறது. இதன் கூர்மையான முன்பகுதி பைக்கிற்கு மேலும் ஒரு ஸ்போர்ட்டியான தோற்றத்தைக் கொடுக்கிறது.

இந்த பைக் இக்னிசன் ரெட் மற்றும் மேட் பாலிஸ்டிக் பிளாக் மெட்டாலிக் ஆகிய இரண்டு கலர் ஆப்ஷன்களில் கிடைக்கிறது. ஐகானிக் ஹோண்டா சிவப்பு நிறத்தில் வரும் இக்னிசன் ரெட் ஆப்ஷன் பைக்கிற்கு கூடுதல் ஸ்போர்ட்டி லுக்கை தருகிறது. ஆடம்பரம் இல்லாத எளிமையான நிறத்தை விரும்புபவர்களுக்கு பாலிஸ்டிக் பிளாக் மெட்டாலிக் ஆப்ஷன் சிறந்த தேர்வாக இருக்கும்.

வசதிகளைப் பொறுத்தவரை, இதில் 5-இன்ச் TFT டிஸ்ப்ளே கொடுக்கப்பட்டுள்ளது. இது ஹோண்டா RoadSync செயலி மூலம் புளூடூத், கால்/SMS அலர்ட்கள் மற்றும் நேவிகேஷன் போன்ற கனெக்டிவிட்டி அம்சங்களை ஆதரிக்கிறது. மேலும் இதில் ரைடு-பை-வயர் த்ரோட்டில் வசதி உள்ளது, இது மூன்று பிரதான ரைடு மோட்கள் மற்றும் 2 கஸ்டமைசபிள் மோட்களை இயக்கும் திறன் கொண்டது. நீங்கள் தேர்ந்தெடுக்கும் மோடிற்கு ஏற்ப இவை பவர் டெலிவரியை மாற்றியமைக்கும். பயணங்களின் போது சாதனங்களை சார்ஜ் செய்ய USB-C சார்ஜிங் போர்ட் இதில் உள்ளது. இதுதவிர டூயல்-சேனல் ABS மற்றும் டிராக்ஷன் கன்ட்ரோல் வசதிகளும் ஸ்டாண்டர்ட் அம்சமாக வருகின்றன.

பைக்தேக்கோவின் கருத்து 

இதன் அறிமுகத்தின் மூலம் சப்-500 cc பிரிவு முன்னெப்போதையும் விட மிகவும் சுவாரஸ்யமாக மாறியுள்ளது. இந்த பைக்கின் விலை GBP 6,999 (இந்திய மதிப்பில் சுமார் ரூ. 8.85 லட்சம்) என நிர்ணயிக்கப்பட்டுள்ளது.

ஒப்பீட்டளவில், சமீபத்தில் விற்பனையில் இருந்து நிறுத்தப்பட்ட கவாஸாகி நிஞ்ஜா ZX-4R பைக்கின் எக்ஸ்-ஷோரூம் விலை ரூ. 9,40,000 ஆக இருந்தது. மிடில்வெயிட் இன்லைன்-ஃபோர் பிரிவு என்பது மிகவும் பிரத்யேகமானது. ஹோண்டா இந்த பைக்கை இந்திய சந்தைக்கு உடனடியாகக் கொண்டுவர வாய்ப்பில்லை, ஒருவேளை அறிமுகப்படுத்தினாலும் அது குறைந்த எண்ணிக்கையிலேயே விற்பனைக்கு வரக்கூடும் என்பதோடு அதன் விலையும் அதிகமாகவே இருக்கும்.