EICMA 2026-ல் ஹார்லி-டேவிட்சன் புதிய 350cc க்ரூஸர் பைக் அறிமுகம்

முக்கிய சிறப்பம்சங்கள்: 

• 350 cc திறனில் புதிய ஹார்லி-டேவிட்சன் X350T பைக் அதிகாரப்பூர்வமாக காட்சிப்படுத்தப்பட்டது.

• தோற்ற அமைப்பில் தற்போதுள்ள X440T மாடலை போன்றே இது வடிவமைக்கப்பட்டுள்ளது.

• புதிய GST 2.0 வரம்பு சலுகைகளைப் பயன்படுத்திக் கொள்ள ஹீரோ மோட்டோகார்ப் திட்டமிட்டுள்ளது.

ஹீரோ மோட்டோகார்ப் நிறுவனம் தனது புதிய ஹார்லி-டேவிட்சன் X350T பைக்கை EICMA 2026 வாகன கண்காட்சியில் சர்வதேச அளவில் அறிமுகப்படுத்தியுள்ளது. அடிப்படையில் இது தற்போது விற்பனையில் உள்ள X440T மாடலின் என்ஜின் அளவைக் குறைத்து உருவாக்கப்பட்ட ஒரு வெர்ஷனாகும். இந்த புதிய க்ரூஸர் பைக் ஒட்டுமொத்த டிசைனில் X440 வரிசையை போன்றே இருந்தாலும், புதிய கலர் ஆப்ஷன்கள், புதுமையான கிராபிக்ஸ் மற்றும் தனித்துவமான பேட்ஜிங் ஆகியவற்றுடன் வெளிவரவுள்ளது.

எக்ஸ்க்ளூசிவ் என்ஜின் விவரங்கள்

என்ஜின் கொள்ளளவைக் குறைப்பதற்காக ஹார்லி-டேவிட்சன் X350T மாடலில் ஸ்ட்ரோக் அளவு குறைக்கப்பட்ட என்ஜின் பொருத்தப்பட்டுள்ளது. இதுகுறித்த அதிகாரப்பூர்வ தொழில்நுட்ப அளவீடுகள் இன்னும் முழுமையாக வெளியாகவில்லை என்றாலும், இந்த என்ஜின் சுமார் 22 PS பவரையும் 30 Nm டார்க்கையும் வெளிப்படுத்தும் என தகவல்கள் தெரிவிக்கின்றன. இது X440 மாடலின் 27.37 PS பவர் மற்றும் 38 Nm டார்க் திறனை விடக் குறிப்பிடத்தக்க அளவில் குறைவாகும். அதேநேரம், இந்த என்ஜின் 6-ஸ்பீடு கியர்பாக்ஸ் மற்றும் ஸ்லிப்பர் கிளட்ச் வசதியுடன் இணைக்கப்பட்டுள்ளது. இதில் எந்த மாற்றமும் இருக்காது என்றே எதிர்பார்க்கப்படுகிறது.

மற்றபடி பைக்கின் மெக்கானிக்கல் ஹார்டுவேர் அமைப்பில் பெரிய மாற்றங்கள் எதுவும் செய்யப்படவில்லை. சேஸி ஃப்ரேம், சஸ்பென்ஷன் செட்டப் மற்றும் பின்பக்க ட்வின் மோனோஷாக் ஆகியவை முந்தைய மாடலைப் போலவே தொடர்கின்றன. அதேபோல், முன்பக்கம் 18-இன்ச் மற்றும் பின்பக்கம் 17-இன்ச் அலாய் வீல்களுடன் ரோடு பயன்பாட்டுக்கு ஏற்ற டயர்கள் இதில் பொருத்தப்பட்டுள்ளன. பிரேக்கிங் அமைப்பைப் பொறுத்தவரை, இரண்டு சக்கரங்களிலுமே டிஸ்க் பிரேக்குகள் மற்றும் டூயல்-சேனல் ABS வசதி மாற்றமின்றி வழங்கப்பட்டுள்ளது. ரைடரின் கூடுதல் பாதுகாப்பிற்காக சுவிட்ச்சபிள் டிராக்‌ஷன் கண்ட்ரோல் சிஸ்டமும் இந்த பைக்கில் இடம்பெற்றுள்ளது.

இந்த புதிய 350 cc க்ரூஸர் பைக் எப்போது விற்பனைக்கு வரும் என்ற அதிகாரப்பூர்வ வெளியீட்டுத் தேதியை நிறுவனம் இதுவரை அறிவிக்கவில்லை. இருப்பினும் இந்தியாவிலும் சர்வதேச சந்தைகளிலும் X440 மாடல்களுடன் இணைந்தே இதுவும் விற்பனை செய்யப்படும் என தெரிகிறது. இந்த புதிய தயாரிப்பின் மூலம் அறிமுகமாகவுள்ள GST 2.0 வரிச் சலுகைகளைத் தங்களுக்கு சாதகமாகப் பயன்படுத்திக்கொள்ள ஹீரோ மோட்டோகார்ப் காய் நகர்த்துவது தெளிவாகத் தெரிகிறது. விற்பனைக்கு வரும்போது இந்த புதிய X350T மாடலானது ராயல் என்ஃபீல்டு மீட்டியார் 350, ஜாவா 42 FJ மற்றும் ஹோண்டா CB350RS போன்ற முன்னணி பைக்குகளுக்கு நேரடிப் போட்டியாக அமையும்.