ஹீரோ எக்ஸ்பல்ஸுக்கு சரியான ஆப்பு? பஜாஜின் புதிய அட்வென்ச்சர் பைக் ஸ்பை ஷாட்ஸ் லீக்!
TFT டிஸ்ப்ளே, LED ஹெட்லைட், லக்கேஜ் ரேக் போன்றவை உள்ளன
முக்கிய தகவல்கள்:
-
இந்த பைக்கைப் பற்றிய கூடுதல் சுவாரஸ்யமான தகவல்கள் தற்போது வெளியாகியுள்ளன
-
பைக்கின் வடிவமைப்பு முழுமையான புரொடக்ஷன் மாடலுக்கு மிகவும் நெருக்கமாக காட்சியளிக்கிறது.
-
அடுத்த ஆண்டு தொடக்கத்தில் இந்த பைக் இந்தியாவில் அதிகாரப்பூர்வமாக களமிறங்கும் என எதிர்பார்க்கப்படுகிறது.
குறைந்த பட்ஜெட் அட்வென்ச்சர் மோட்டார்சைக்கிள் மார்க்கெட்டில் ஒரு கலக்கு கலக்க பஜாஜ் நிறுவனம் தயாராகி வருகிறது. இந்நிறுவனத்தின் வரவிருக்கும் புதிய ADV மாடல் பைக் மீண்டும் ஒருமுறை டெஸ்டிங்கின் போது கேமராவில் சிக்கியுள்ளது. தற்போது வெளியாகியுள்ள புதிய ஸ்பை ஷாட் புகைப்படங்கள் மூலம், இந்த பைக் அறிமுகமாகும் போது என்னென்ன வசதிகளுடன் வரும் என்பதை தெளிவாக கணிக்க முடிகிறது.
பல்சர் போன்ற TFT கன்சோல்
தற்போது வெளியாகியுள்ள புதிய ஸ்பை புகைப்படங்களின்படி, சமீபத்திய பல்சர் மாடல்களில் இருப்பதைப் போன்ற செவ்வக வடிவ TFT இன்ஸ்ட்ரூமென்ட் கன்சோல் இதிலும் கொடுக்கப்பட்டுள்ளது. இதில் தகவல்கள் எந்த லேஅவுட்டில் காட்சியளிக்கும் என்பது முழுமையாக தெரியவில்லை என்றாலும், ரைடர் அமரும் இடத்திலிருந்து ஸ்கிரீன் படு தெளிவாக தெரிகிறது.
அதே சமயம், இதன் ஸ்விட்ச்கியர் அமைப்பானது சமீபத்திய பல்சர் மாடல்களில் இருந்து சற்றே மாறுபட்டுள்ளது. வலது பக்க ஸ்விட்ச்கியரில் ஹெட்லைட் கண்ட்ரோல் ஸ்லைடர் இடம்பெற்றுள்ளதாகவும், இடது பக்க கிளஸ்டரின் மேற்பகுதியில் கூடுதலாக ஒரு ஸ்விட்ச் சேர்க்கப்பட்டுள்ளதாகவும் தெரிகிறது. அத்துடன் சற்று உயரமான ஹேண்டில்பார், வழக்கமான ரியர் வியூ மிரர்கள் மற்றும் ஹேண்ட்கார்டுகள் ஆகியவை காக்பிட் செட்டப்பை முழுமையாக்குகின்றன.
அட்வென்ச்சர் ஸ்டைலிங் மற்றும் அசத்தலான ஹார்டுவேர்
பைக்கின் முன்பகுதியில் ஒரு கூர்மையான ஆங்குலர் ஹெட்லைட் அமைப்பு கொடுக்கப்பட்டுள்ளது. ஹெட்லைட்டுக்கு கீழே நீட்டிக்கொண்டிருக்கும் வழக்கமான ADV பீக், இந்த பைக்கிற்கு ஒரு அக்ரஸிவ் அட்வென்ச்சர் லுக்கை கொடுக்கிறது.
நீண்ட தூர டூரிங் பைக்குகளில் இருப்பதைப் போன்ற உயரமான விண்ட்ஸ்கிரீனுக்கு பதிலாக, இந்த டெஸ்ட் மாடலில் சிறிய அளவிலான ஹெட்லைட் கவுல் மட்டுமே இடம்பெற்றுள்ளது. இதன் ஃபியூயல் டேங்க் பகுதி பக்கவாட்டு பேனல்களுடன் கச்சிதமாக இணைகிறது. இருப்பினும், பைக்கில் ஒட்டப்பட்டுள்ள கேமோஃபிளேஜ் ஸ்டிக்கர்கள் காரணமாக பைக்கின் இறுதி பாடிவொர்க் எப்படி இருக்கும் என்பதை இன்னும் தெளிவாக பார்க்க முடியவில்லை.
புகைப்படங்களில் தெரியும் ஹார்டுவேர் அமைப்பை பொறுத்தவரை, ரப்பர் கெய்ட்டர்களுடன் கூடிய டெலஸ்கோப்பிக் ஃபோர்க், வயர்-ஸ்போக் வீல்கள் மற்றும் இரண்டு சக்கரங்களிலும் டிஸ்க் பிரேக்குகள் ஆகியவை இடம்பெற்றுள்ளன. கரடுமுரடான சாலைகளில் செல்லும்போது பைக்கிற்கு கூடுதல் பாதுகாப்பு தரும் வகையில் டியூபுலர் இன்ஜின் கார்டுகள் மற்றும் அண்டர்பாடி பாதுகாப்பு பிளேட்டும் சேர்க்கப்பட்டுள்ளன. மேலும், பின்பக்க வீலில் ABS சென்சார் ரிங் இருப்பதையும் தெளிவாக காண முடிகிறது.
உயரமான எக்ஸாஸ்ட் மற்றும் ரியர் லக்கேஜ் கேரியர்
பைக்கின் பின்பகுதியில், பின்னால் அமருபவருக்கு சற்று உயரமான அமைப்புடன் கூடிய நீளமான சிங்கிள்-பீஸ் சீட் கொடுக்கப்பட்டுள்ளது. சில்வர் ஃபினிஷ் செய்யப்பட்ட கிராப் ரெயில்கள் பின்புற லக்கேஜ் கேரியர் வரை நீள்கின்றன. இதன் மூலம் டாப் பாக்ஸ் அல்லது பிற டூரிங் ஆக்சஸரீஸ்களை மிக எளிதாக இதில் பொருத்திக் கொள்ள முடியும்.
தண்ணீர் நிறைந்த பகுதிகளில் எளிதாக கடந்து செல்லும் வகையில் இதன் எக்ஸாஸ்ட் சற்றே உயரமான இடத்தில் பொருத்தப்பட்டுள்ளது; மேலும் இதற்கு ஒரு பெரிய ஹீட் ஷீல்டும் கொடுக்கப்பட்டுள்ளது. இந்த ஒட்டுமொத்த அம்சங்களை பார்க்கும்போது, தினசரி பயன்பாட்டிற்கு மட்டுமல்லாமல், குண்டும் குழியுமான சாலைகள் மற்றும் ஆஃப்-ரோடு டிராக்குகளை அனாயசமாக சமாளிக்கும் நோக்கில் இந்த பைக் உருவாக்கப்பட்டுள்ளது தெளிவாகிறது.
பல்சர் N250 SS இன்ஜின் இடம்பெற வாய்ப்பு
வரவிருக்கும் இந்த ADV பைக்கின் இன்ஜின் விபரங்களை பஜாஜ் இதுவரை அதிகாரப்பூர்வமாக வெளியிடவில்லை. இருப்பினும், சமீபத்திய பல்சர் N250 SS மாடலில் பயன்படுத்தப்பட்டுள்ள அதே 250cc பவர்டிரெயினே இதிலும் பயன்படுத்தப்படலாம் என எதிர்பார்க்கப்படுகிறது.
பிராண்டின் மார்க்கெட் பொசிஷனிங் மற்றும் தயாரிப்பு செலவு ஆகியவற்றைக் கருத்தில் கொள்ளும்போது இது மிகச் சரியான முடிவாக இருக்கும். ஏனெனில், இந்த பைக்கிற்காக புதிதாக ஒரு இன்ஜினை உருவாக்குவதற்கு பதிலாக, ஏற்கனவே பயன்பாட்டில் இருக்கும் வெற்றிகரமான ஒரு பவர்டிரெயினை பயன்படுத்துவது நிறுவனத்திற்கு கைகொடுக்கும்.
மேலும், ஹீரோ XPulse 210 மற்றும் அண்மையில் அறிமுகமான ஹோண்டா XR300 Rally போன்ற மாடல்களுக்கு கடுமையான போட்டியைக் கொடுக்க இந்த பஜாஜ் பைக்குக்கு இந்த இன்ஜின் நிச்சயம் கூடுதல் பலம் சேர்க்கும். இந்த பைக்குகளின் இன்ஜின் திறன் வெவ்வேறாக இருந்தாலும், ஆஃப்-ரோடு சாகசங்களை விரும்புவோருக்கு ஏற்ற மாடல்களாக இவை களமிறங்குகின்றன.
இந்தியாவில் எப்போது அறிமுகம்?
பஜாஜ் பிரேசில் பிரிவின் செயல் இயக்குநரான வால்டிர் ஃபெரீரா, வாடிக்கையாளர்களின் மாறுபட்ட தேவைகளைப் பூர்த்தி செய்யும் வகையில் டிரெயில் பிரிவில் பல மோட்டார்சைக்கிள்களை உருவாக்கும் பணியில் நிறுவனம் ஈடுபட்டு வருவதாக முன்னரே குறிப்பிட்டிருந்தார். மேலும், 2026 ஆம் ஆண்டின் இறுதிக்குள் பிரேசில் சந்தையில் இது அறிமுகப்படுத்தப்படலாம் என்பதையும் அவர் சுட்டிக்காட்டியிருந்தார்.
இருப்பினும், இந்தியாவில் இது எப்போது அறிமுகமாகும் என்ற அதிகாரப்பூர்வ தேதியை பஜாஜ் இதுவரை அறிவிக்கவில்லை. இந்த பைக் அடுத்த ஆண்டின் தொடக்கத்தில் இந்தியாவில் அதிகாரப்பூர்வமாக களமிறங்கும் என்றும், இதன் எக்ஸ்-ஷோரூம் விலை சுமார் ₹2 லட்சம் வரை நிர்ணயிக்கப்படலாம் என்றும் எதிர்பார்க்கப்படுகிறது. இந்த பைக்கின் அதிகாரப்பூர்வ பெயர் இன்னும் முடிவாகவில்லை என்றாலும், பஜாஜ் ஏற்கனவே டிரேட்மார்க் செய்துள்ள 'Trekker' என்ற பெயர் இதற்கு வைக்கப்பட அதிக வாய்ப்புகள் உள்ளன.